lundi 20 novembre 1989

tetum

Konvensaun kona-ba Direitu Labarik Nian

estadu parte sira ba konvensaun ida ne’e:
konsidera katak, tuir prinsípiu sira ne’ebé proklama tiha ona iha Karta Nasoins Unidas nian, rekoñesimentu kona-ba dignidade ne’ebé iha kedas ona no direitu ne’ebé hanesan no lábele hasai husi membru família humanu tomak mak hanesan baze ba liberdade, justisa no dame iha mundu rai klaran.
hanoin katak, estadu barak ne’ebé tama iha Nasoins Unidas, reafirma fali iha Karta Nasoins Unidas nian laran, sira nia fiar ba direitu fundamental ema nian no dignidade no valor ema nian, no mós determina atu foti progresu sosiál no estandar moris ne’ebé diak liu iha liberdade ida mak luan liu.
rekoñese katak, Nasoins Unidas iha Deklarasaun Universal Direitus Humanus no Konvensaun Internasionál hirak ba Direitus Humanus, proklama no aseita tiha ona katak ema ida-idak iha direitu atu hetan direitu no liberdade sira ne’ebé hateten tiha iha laran, labele haree ba distinsaun oin-oin, hanesan rasa, kor, sexu, lian, relijiaun, opiniaun polítika ka seluk, moris hun nasionál ka sosiál, rikusoin, moris ka pozisaun seluk.
haree katak, iha Deklarasaun Universal Direitus Humanus laran, Nasoins Unidas proklama tiha ona katak labarik iha direitu atu hetan kuidadu no tulun
espesiál.
fiar metin katak família, hanesan grupu fundamentál sosiedade nian no hanesan ambiente naturál ba dezenvolvimentu no moris diak membru família nian liu-liu labarik sira, tenki hetan protesaun no tulun ne’ebé presiza atu nune’e família iha kapasidade atu simu responsabilidade ne’e iha komunidade nia laran.
rekoñese katak labarik, atu dezenvolve diak liu tan ninian personalidade, sei moris iha ambiente família ida, iha ambiente sosiadade ne’ebé hakmatek, hadomi no komprende malu.
konsidera katak labarik tenki prepara atu moris nu’udar ema mesak ida iha sosiedade nian laran no haboot ho espíritu ne’ebé proklama tiha iha Karta Nasoins Unidas nian, no liu-liu ho espíritu dame, dignidade, toleránsia, liberdade, igualidade no solidariedade nian.
hanoin katak nesesidade atu fo kuidadu partikulár ba labarik ne’ebé tau mak deklara tiha ona iha Deklarasaun Jenebra kona-ba Direitu Labarik nian iha tinan 1924 no iha Deklarasaun kona-ba Direitu Labarik nian ne’ebé adopta tiha ona husi Nasoins Unidas iha loron 20 fulan Novembru 1959 no rekoñese tiha ona iha Deklarasaun Universal Direitus Humanus nian, iha Konvensaun Internasionál kona-ba Direitu Sivil no Politiku (liu-liu iha artigu 23 no 24), iha Konvensaun Internasionál kona-ba Direitu Ekonómiku, Sosial no Kultura (liu-liu iha artigu 10) no iha estatutu no instrumentu relevante sira husi ajensia espesiál sira no organizasaun internasionál sira ne’ebé hanoin kona-ba labarik nia moris diak.
hanoin katak, hanesan hakerek tiha ona iha Deklarasaun (kona-ba) Direitu Labarik nian, “labarik, tanba razaun seidauk iha maturidade fíziku ka mentál, prezisa hetan hahalok protesaun no kuidadu, inklui mós protesaun legál ne’ebé loos, molok moris no mós wainhira moris tiha.”
hanoin fali-ba, provisaun sira husi Deklarasaun Prinsipiu Sosiál no Legál nian kona-ba Protesaun no Moris Diak Labarik nian, ho Referénsia Espesiál atu Hadia Kolokasaun no Adopsaun Nasionál no Internasionálmente; Regra Standar Minímu Na- soins Unidas nian ba Administrasaun Justisa Juveníl (Regra Beijing), no Deklarasaun kona-ba Proteksaun ba Feto no Labarik iha Emerjensia no iha Funu nia laran,
rekoñese katak, iha rai hotu-hotu iha mundo rai klaran, iha labarik sira ne’ebé moris iha kondisaun ne’ebé susar teb-tebes, no tanba ne’e sira presiza konsiderasaun espesiál.
haree importansia husi tradisaun no valór kulturál rai ida-idak nian ba protesaun no dezenvolvimentu diak ba labarik.
rekoñese importansia husi kooperasaun internasionál atu halo diak liu kondisaun moris labarik
nian iha Estadu ida-idak, liu-liu iha Estadu subdezenvolvidu,
konkorda tiha ona hanesan tuir mai ne’e:
Parte I
Artigu 1
Tuir intensaun Konvensaun ne’e nian, labarik katak, ema ne’ebé iha tinan sanulu resin ualu (18) mai kraik, se lae karik tuir lei ne’ebé aplika ba labarik dehan katak bolu ona ema boot molok ne’e.
Artigu 2
1 Estadu Parte sira sei respeita no garante direitu sira ne’ebé hato’o iha Konvensaun ida ne’e nia laran, ba labarik hotu-hotu iha sira nia jurisdisaun nia laran, la ho diskriminasaun oin-oin, la haree ba labarik ka labarik nia inan-aman ka ema ne’ebé hakiak labarik nia rasa, kor kulit, sexu, lian, relijiaun, opiniaun politika, ka seluk, moris hun etníku ka sosiál, rikusoin, aleijadu, moris ka husi situasaun seluk.
2 Estadu Parte sira sei hola medida hotu ne’ebé loos atu garante katak labarik hetan protesaun hasoru hahalok diskrimiminasaun ka kastigu oin-oin ne’ebé bazeia ba situasaun jurídika, aktividade, hato’o opiniaun, ka fiar metin husi labarik nia inanaman, ema ne’ebé hakiak, ka membru família sira.
Artigu 3
1 Iha hahalok hotu kona-ba labarik, ne’ebé hala’o husi instituisaun públiku ka privadu, tribunál, instituisaun governu, instituisaun lejislatívu, interese diak liu labarik nian sei hetan konsiderasaun uluk.
2 Estadu Parte sira sei haka’as an atu garante katak labarik sei hetan protesaun no kuidadu ne’ebé nia presiza ba ninia moris diak, hodi konsidera mós direitu no obrigasaun inan-aman, ema ne’ebé hakiak, ka ema seluk ne’ebé tuir lei iha responsabilidade ba labarik ne’e, no, ba intensaun ida ne’e, sei halao hahalok lejislativu no administrativu hotu ne’ebé mak loos.
3 Estadu Parte sira sei garante katak institusaun sira, servisu sira no fasilidade hotu ne’ebé iha resposibilidade kona-ba kuidadu ka protesaun labarik nian, sei halo tuir norma ne’ebé hatún husi autoridade ne’ebé kompetente, liu-liu iha seksaun seguransa no saúde, tuir kuantidade no pesoal ne’ebe mak los, no mós supervisaun kompetente.
Artigu 4
Estadu Parte sira sei hola desizaun lejislativu no administrativu, no medida seluk tan atu implementa direitu hirak ne’ebé hakotu tiha ona iha Konvensaun ida ne’e. Kona-ba direitu ekonomia, sosiál no kulturál, Estadu Parte sira sei hola medida máximu husi rekursu ne’ebé iha, no, wainhira presiza, iha kontextu kooperasaun internasionàl nia laran.
Artigu 5
Estadu Parte sira sei respeita responsabilidade, direitu no obrigasaun hirak husi inan-aman, ka wainhira aplika, husi membru família tomak ka komunidade ne’ebé hakotu tuir kostume lokál atu tau matan, ema ne’ebé hakiak, ka ema seluk ne’ebé iha responsabilidade ba labarik ne’e, atu hato’o diresaun no hatudu dalan ba labarik hodi hala’o ninia direitu sira ne’ebé rekoñese tiha iha Konvensaun ne’e, ho dalan ida ne’ebé tuir kapasidade labarik nian ne’ebé sei dezenvolve mós.
Artigu 6
1 Estadu Parte sira rekoñese katak labarik ida-idak iha direitu ne’ebé iha kedas wainhira moris.

2 Estadu Parte sira sei haka’as-an atu garante to’o máximu bele, sobrevivensia no dezenvolvimentu labarik nian.
Artigu 7
1 Labarik sei rejista kedas wainhira nia moris, no sei iha direitu atu hetan naran, direitu atu hetan nasionalidade, no mós se bele karik iha direitu atu koñese ninia inan-aman rasik no hetan kuidadu husi sira.
2 Estadu Parte sira sira sei garante katak direitu hirak ne’e sei hala’o tuir sira nia lei nasionál no sira nia obrigasaun tuir instrumentu internasionál ne’ebé iha relasaun ho sektór ida ne’e, liu-liu wainhira labarik karik sei laíha nasionalidade.
Artigu 8
1 Estadu Parte sira sira sei haka’as an atu respeita direitu labarik nian atu hametin ka defende sira nia identidade, inklui nasionalidade, naran no relasaun família ne’ebé rekoñese husi lei, la ho interferénsia ilegál.

2 Se karik, ema hasai ho ilegál parte balun ka parte hotu husi labarik nia identidade, Estadu Parte sira sei fo tulun no protesaun diak ho vizaun atu lalais rekoñese fali labarik nia identidade.
Artigu 9
1 Estadu Parte sira sei garante katak labarik sei la haketak-an husi inan-aman se la tuir labarik nia hakarak, se lae karik autoridade kompetente ne’ebé hakru’uk ba revisaun judisiál sei hakotu tuir lei no prosesu ne’ebé iha, katak haketak-an ida nune’e presiza duni ba labarik ne’e tanba ninia interese rasik duni. Determinasaun nune’e sei presiza karik iha kazu partikulár, hanesan kazu ne’ebé involve abusu ka labarik ne’ebé inan-aman husik mesak, ka kazu ne’ebé inan-aman la hela hamutuk ne’e duni tenke hola desizaun kona-ba labarik nia hela fatin.
2 Iha prosesu lei nian ruma tuir parágrafu 1 husi artigu ida ne’e, ema hotu ne’ebé iha interese ba prosesu sei hetan oportunidade atu partisipa iha prosesu ne’e, no mós atu hato’o sira nian opiniaun.
3 Estadu Parte sira sei respeita direitu labarik nian ne’ebé haketak-an husi inan deit ka aman deit ka inan ho aman hotu, atu hala’o nafatin relasaun privadu no relasaun diretamente ho inan-aman, se lae karik keta kontra interese diak liu labarik nian.
4 Iha situasaun haketak-an hirak ne’ebé hanesan rezultadu husi Estadu Parte nia hahalok hanesan detensaun, dadur, desteru, deportasaun ka mate (inklui mós mate tanba buat ruma maibe wainhira ema ne’e iha dadur husi Estadu) husi inan ka aman ida ka husi labarik ne’e, mak Estadu Parte wainhira hetan pedidu, sei hato’o ba inan-aman ka labarik ka, se diak, membru família seluk ida kona-ba informasaun ne’ebé esensiál hanesan iha ne’ebé membru família ne’ebé lakon, se lae karik wainhira fó informasaun hanesan ne’e sei interompe labarik nia moris diak. Estadu Parte sei mós garante katak wainhira ema hato’o pedidu hanesan ne’e, buat ne’e sei laiha konsequénsia aat ba ema ka ema sira ne’ebé iha interese ba.
Artigu 10
1 Tuir obrigasaun Estadu Parte hanesan iha Artigu 9, parágrafu 1, aplikasaun husi labarik ka inan-aman sira atu tama ka sai husi Estadu ne’ebé partisipa, ho objetivu atu hamutuk fali ho família, Estadu Parte sira mak sei toma konta aplikasaun ida e’e ho hahalok ne’ebé positivu, ne’ebé tuir umanidade no mos ne’ebé lalais. Estadu Parte sira sei mós garante katak hato’o aplikasaun hanesan ne’e sei laiha konsequénsia aat ba ema ne’ebé husu no ba sira-nia membru família sira.
2 Labarik ne’ebé nia inan-aman hela iha Estadu seluk iha direitu atu hametin relasaun pesoál no kontaktu direktu ho regulár ho inan no aman, se lae iha karik situasaun esepsionál . Ba intensaun ida ne’e, no tuir obrigasaun Estadu Parte nian hanesan iha Artigu 9, parágrafu 1, Estadu Parte sira sei respeita direitu labarik nian no mós inan-aman nian atu sai husi rai ruma, hanesan mós sira nia rai rasik, no mós sira nia direitu atu tama iha sira nia rai rasik. Direitu atu husik rai ruma sei hakru’uk deit ba limitasaun ne’ebé hakotu husi lei no nesesáriu atu proteje seguransa nasionál, orden públiku, saúde ka morál públiku ka direitu ho liberdade ema seluk nian, no mós tenke tuir direitu sira seluk ne’ebé rekoñese tiha ona iha Konvensaun ida ne’e.
Artigu 11
1 Estadu Parte sira sei hola medida atu halakon hahalok atu haruka sai labarik sira ilegálmente ba rai seluk no labele fila fali.
2 Kona-ba objetivu ida ne’e, Estadu Parte sira sei promove ka halo akordu bilaterál ka multilaterál sira ka adesaun ba akordu ne’ebé iha tiha ona.
Artigu 12
1 Estadu Parte sira sei garante ba labarik ne’ebé iha kapasidade atu forma sira nian opiniaun rasik, katak sira iha direitu atu hato sira nian opiniaun ho livre kona-ba buat hotu-hotu ne’ebé influensia ba nia, ho opiniaun labarik sei hetan konsiderasaun ne’ebé loos, konforme idade no maturidade labarik nian.
2 Ba intensaun ida ne’e, labarik sei hetan liu-liu oportunidade atu ema bele rona sira iha prosesu justisa no administrativu ne’ebé influensia ba labarik, diretamente ka husi reprezentante ka organizasaun ne’ebé loos, hodi dalan ida ne’ebé tuir regra prosesu nian husi lei nasionál.
Artigu 13
1 Labarik iha direitu atu hato’o ninia opiniaun ho livre, direitu ne’e inklui mós liberdade atu buka hatene, simu no fó informasaun no ideia kona buat oin-oin, sei la iha konsiderasaun ba limitasaun ruma, ka tuir media seluk tuir labarik nia hakarak.
2 Hala’o direitu ida ne’e, bele mós iha karik limitasaun balun, maibé so limitasaun ne’ebé akotu tuir lei no ne’ebé nesesáriu :
a) Atu respeita direitu ka reputasaun ema seluk nian; ka
b) Atu proteje seguransa nasionál ka orden, saúde ka morál públiku.
Artigu 14
1 Estadu Parte sira sei respeita direitu labarik nian ba liberdade ba hanoin, hanoin ho laran no relijiaun.
2 Estadu Parte sira sei respeita direitu no obrigasaun inan-aman nian no, se aplika, direitu no obrigasaun ema ne’ebé hakiak labarik tuir lei nian, atu hatudu dalan ba labarik hodi hala’o ninia direitu ho dalan ne’ebé tuir kapasidade labarik nian ne’ebé sei dezenvolve hela.
3 Liberdade atu manifesta relijiaun ka fiar ema ida-idak nian so hakru’uk ba limitasaun ne’ebé de- termina tuir lei, no ne’ebé nesesáriu atu proteje seguransa, orden, saúde no morál públiku ka direitu no liberdade fundamentál ema seluk nian.
Artigu 15
1 Estadu Parte sira rekoñese labarik nia direitu ba liberdade atu halo asosiasaun no liberdade atu halibur malu ho dame.
2 La bele iha limitasaun ba hala’o direitu sira ne’e, se lae karik limitasaun ne’ebé nesesáriu iha sosiedade demokrátiku ida laran, ba interese seguransa nasionál ka seguransa públiku, orden públiku, protesaun ba saúde ka moral públiku, ka protesaun ba direitu no liberdade ema seluk nian.
Artigu 16
1 Láiha labarik ida mak sei hetan interferénsia ilegál nar-naran deit kona-ba ninia moris privadu, família, uma kain ka korespondénsia, hanesan mós ataka ne’ebé ilegál hasoru ninia honra no reputasaun.
2 Labarik iha direitu ba protesaun husi lei hasoru interferénsia ka ataka hanesan ne’e.
Artigu 17
Estadu Parte sira rekoñese funsaun importante ne’ebé hala’o husi orgaun komunikasaun sosial sira no garante katak labarik bele hetan informasaun no materiá husi fonte nasionál no internasionál oin-oin, liu-liu materiá ho objetivu atu foti labarik nia moris sosiál mak diak, espiritual no morál no mós ba isin no neon diak.
a) Fó beran boot ba media atu fahe informasaun no matéria sosiál ne’ebé fó benefísiu sosiál
no kulturál ba labarik tuir espiritu artigu 29.
b) Fó beran boot ba hala’o servisu hamutuk internasionál kona-ba halo, troka no fahe informasaun no matéria husi fonte kulturál nasionál no internasionál oin-oin
c) Fó beran boot atu halo no fahe livru labarik sira nian.
d) Fó beran boot ba orgaun komunikasaun sosial atu fó atensaun partikulár ba nesesidade linguístika husi labarik ne’ebé halo parte husi grupu minoritariu ka ema rai nain.
e) Fó beran boot ba dezenvolvimentu prinsípiu orientasaun nian ne’ebé loos atu proteje labarik husi informasaun no materia sira ne’ebé perigozu ba sira nia moris, hodi hanoin nafatin provizaun husi artigu 13 no artigu 18.
Artigu 18
1 Estadu Parte sira sei hala’o esforsu ne’ebé diak liu atu garante rekoñesimentu ba prinsípiu katak inan no mós aman iha responsabilidade hamutuk kona-ba hakiak no dezenvolvimentu labarik. Inanaman, ka ema ne’ebé hakiak labarik legalmente, iha responsabilidade uluk liu atu hakiak no dezenvolve labarik ne’e. Sira nia preokupasaun báziku mak’ labarik nia interese ne’ebé diak liu.
2 Atu garante no promove direitu hirak ne’ebé hato’o iha Konvensaun ida ne’e, Estadu Parte sira sei fó tulun diak ida ba inan-aman no ema ne’ebé hakiak labarik legalmente atu hala’o sira nia responsabilidade hodi hakiak labarik, no mós sei garante katak iha dezenvolvimentu ba institusaun, fasilidade ho tulun atu hakiak labarik.
3 Estadu Parte sira sei hola medida sira atu garante katak labarik ne’ebé nia inan-aman servisu hotu, iha direitu atu hetan benefísiu husi servisu no fasilidade tau matan ba labarik nian ne’ebé sira mós iha direitu atu hetan tuir sira-nia situasaun.
Artigu 19
1 Estadu Parte sira sei hola medida legislativa, administrativu, sosiál no edukasaun nian e’ebé diak atu proteje labarik husi forma oin-oin hahalok violénsia fíziku no mentál, kanek, ka abusu, neglijente ka tratamentu neglijente, hahalok aat ka esplorasaun, inklui mós violénsia seksuál, wainhira labarik sei hela ho inan-aman ka ema (sira) ne’ebé hakiak legalmente ka ema seluk (sira) ne’ebé hakiak labarik.
2 Medida protesaun hotu hanesan ne’e, se diak karik, sei inklui prosesu efektivu hirak atu harii programa sosiál atu fó tulun ne’ebé presiza ba labarik, no ba sira ne’ebé hakiak labarik, no mós atu halo forma seluk prevensaun no ba identifikasaun, halo relatoriu, transmisaun, investigasaun, tratamentu no hodiba-oin kazu hahalok aat ba labarik hanesan hakerek tiha ona iha leten, no se presiza karik, ba mós ba intervensaun judisiál .
Artigu 20
1 Labarik ida ne’ebé lakon tiha nia ambiente família ho temporária ka permanente, ka, tuir ninia interese ne’ebé diak liu lábele hela bei-beik iha ambiente ne’e, iha direitu atu hetan apoiu no tulun espesiál husi Estadu.
2 Estadu Parte sira tuir sira nia lei nasionál, sei garante kuidadu alternativu ba labarik sira ne’ebé iha situasaun hanesan ne’e.
3 Kuidadu ba labarik hanesan ne’e bele inklui, mós nu’udar, forma kolokasaun familiar nian, lei Kafalah Islâmiku nian, adopsaun ka se presiza karik, tau iha institusaun kuidadu labarik nian ne’ebé diak. Wainhira atu konsidera solusaun ruma, tenki haree loloos ba hakarak atu hetan kontinuidade ba hakiak labarik nian no mós ba labarik nia suku, relijiaun, kultura no lian rasik.
Artigu 21
Estadu Parte sira ne’ebé rekoñese no/ka permite sistema adopsaun ida, sei garante katak interese diak liu labarik nian sei hetan konsiderasaun bo’ot liu, no sira sei mós:
a) Garante katak adopsaun ba labarik hetan autorizasaun so husi autoridade ne’ebé kompetente, ne’ebé determina, tuir lei no prosesu ne’ebé iha, no tuir informasaun hotu ne’ebé iha relasaun loos no bele fiar, katak adopsaun ne’e bele halo, hodi hanoin nafatin situasaun labarik iha relasaun ho inan-aman, membru família sira no ema ne’ebé hakiak legalmente, no katak, wainhira presiza, ema sira ne’ebé iha interese ba adopsaun ida, ne’e hatene no fó lisensa tiha ona kona-ba adopsaun ne’e tuir ho konsellu ne’ebé nesesáriu.
b) Rekoñese katak adopsaun husi rai ida ba rai seluk bele konsidera hanesan alternativu kuidadu ba labarik, wainhira labarik lábele hakiak husi família ida ka adopta husi família ida, ka lábele hetan kuidadu ho dalan loos iha labarik ne’e nia rai laran rasik.
c) Garante katak labarik ne’ebé adopta husi rai ida ba rai seluk sei hetan nafatin protesaun no norma hirak ne’ebé hanesan ho protesaun no norma ne’ebé aprova ona iha kazu adopsaun nasionál.
d) Hola medida hotu ne’ebé diak atu garante katak iha kazu adopsaun husi rai ida ba rai seluk, ema ne’ebé involve iha adopsaun ida ne’e sei lá hetan osan ne’ebé la loos.
e) Promove, wainhira loos, objetivu hirak husi artigu ne’e, hodi hala’o akordu ka tratadu bilaterál ka multilateral sira, no haka’as an, iha konseitu ne’e nia laran, atu garante katak hahalok atu tau labarik iha Estadu seluk mak hala’o husi autoridade ka orgaun ne’ebé kompetente.
Artigu 22
1 Estadu Parte sira sei hola medida sira ne’ebé loos atu garante katak labarik ida ne’ebé buka atu hetan estatutu refujiadu, ka konsidera nu’udar refujiadu tuir lei no prosesu internasionál ka nasionál ne’ebé aplika, labarik ne’ebé inan-aman tuir no mós sira ne’ebé ema seluk de’it mak tuir, sei hetan protesaun no tulun humanitáriu ne’ebé loos atu bele goza direitu relevante sira ne’ebé hato’o iha Konvensaun ida ne’e laran no mós direitus humanus internasional ka instrumentu humanitáriu sira nian ne’ebé Estadu sira sai Partispante.
2 Ba objetivu ne’e, Estadu Parte sira, wainhira sira konsidera katak loos, sei fó kooperasaun ba esforsu hotu ne’ebé Nasoins Unidas mak hala’o no organizasaun intergovernamental sira ka organizasaun laos governamental ne’ebé servisu hamutuk ho Nasoins Unidas mak hala’o, atu proteje no tulun labarik sira no buka atu hetan, inan-aman ka membru família ruma husi labarik refujiadu atu nune’e bele hetan informasaun ne’ebé nesesáriu atu labarik ida ne’e bele hamutuk fali ho ninia família. Iha kazu ne’ebé mak lá hetan fali inan-aman ka membru família seluk, labarik ne’e sei hetan protesaun ida diak hanesan ho labarik seluk ne’ebé lakon ambiente família ho permanente ka provizóriu tanba razaun saide de’it, hanesan hateten iha Konvensaun ne’e.
Artigu 23
1 Estadu Parte sira sei rekoñese katak labarik ne’ebé aleijadu mentálmente ka fizikamente tenki hetan moris diak no hakmatek, iha kondisaun ne’ebé garante dignidade, aumenta fiar an rasik no fasilita labarik atu partisipa ho aktivu iha komunidade nia laran.
2 Estadu Parte sira rekoñese direitu labarik aleijadu nian atu hetan kuidadu espesiál no sei fó beran boot ba no garante, tuir rekursu ne’ebé iha, ba labarik ne’ebé iha direitu no mós ba ema sira ne’ebé iha responsabilidade atu hakiak labarik ida ne’e, tulun ne’ebé diak ba labarik nia kondisaun no mós ba situasaun inan-aman nian ka ema seluk ne’ebé tau matan ba labarik ne’e.
3 Hodi rekoñese nesesidade espesiál labarik aleijadu nian, tulun ne’ebé fó tuir parágrafu 2 artigu ne’e sei gratuitu, wainhira bele, hodi fó atensaun ba rekursu osan inan-aman nian ka ema seluk ne’ebé tau matan ba labarik ne’e, no sei halo planu ba tulun ida ne’e atu garante katak labarik ne’ebé aleijadu bele hetan no simu edukasaun, treinu, asisténsia saúde, asistensia rehabilitasaun, preparasaun ba kampu servisu nian no oportunidade ba halimar ho maneira ida bele tulun labarik atu hetan integrasaun sosiál no dezenvolvimentu individuál ne’ebé diak liu wainhira bele, inklui mós ninia desenvolvimentu kulturál no espirituál.
4 Estadu Parte sira sei foti, ho espiritu kooperasaun internasionál, troka informasaun ne’ebé diak iha sektór asisténsia saúde prevene moras no tratamentu médiku, psikolojia no funsionál ba labarik aleijadu, inklui mós fahe no asesu ba informasaun kona-ba metódu hirak rehabilitasaun, edukasaun no asisténsia vokasional, ho objetivu atu fó posibilidade ba Estadu Parte atu aumenta sira nia kapasidade no matenek no mós atu aumenta sira nia esperiénsia iha sektór sira ne’e. Iha kazu ne’e sei fó liu atensaun espesiál ba nesesidade Estadu sub-dezenvolvidu sira.
Artigu 24
1 Estadu Parte sira rekoñese direitu labarik nian atu hetan nivel saúde diak liu ne’ebé bele hetan, no hetan fasilidade tratamentu moras no rehabilitasaun saúde. Estadu Parte sei haka’as an atu garante katak láiha labarik ida mak bele lakon ninia direitu atu hetan asisténsia tratamentu saúde nian hanesan ne’e.
2 Estadu Parte sira sei buka atu hala’o implementasaun tomak ba direitu ida ne’e no partikularmente sei hola medida sira ne’ebé loos atu :
a) Hamenus numeru bebé no labarik ne’ebé mate;
b) Garante asisténsia médiku no tratamentu saúde nian ne’ebé presiza ba labarik tomak ho konsentra nafatin ba desenvolvimentu tratamentu báziku saúde nian;
c) Halakon moras no malnutrisaun, inklui mós iha tratamentu saúde baziku laran, liu husi, hanesan uza teknolojia ne’ebé iha no husi fó aihan ho nutrisaun diak no bee moos, hodi konsidera mós kona-ba perigu no risku husi polusaun ambiente nian;
d) Garante tratamentu saúde ne’ebé loos ba inan molok no wainhira tuur-ahi tiha.
e) Garante katak grupu komunidade tomak, liu-liu inan-aman no labarik sira, hetan informasaun, asesu ba edukasaun, no hetan apoiu hodi hala’o matenek baziku kona-ba saúde no nutrisaun labarik nian vantajen husi fó susu been inan-nian, ijene/moris moos, ambiente ne’ebé moos no prevensaun asidente.
f) Desenvolve tratamentu saúde prevensaun nian, konselhu ba inan-aman no edukasaun no asistensia planeamentu família nian.
3 Estadu Parte sira sei hala’o buat hotu ne’ebé efektivu no loos ho objetivu atu halakon prátika tradisionál ne’ebé halo aat ba saúde labarik nian.
4 Estadu Parte sira sei haka’as-an atu foti no fo beran boot ba kooperasaun internasionál ho objetivu atu realiza, progresivamente totalmente direitu ne’ebé rekoñese tiha ona iha artigu ne’e. Iha kazu ne’e, atensaun espesiál sei fó ba nesesida Estadu dezenvolvidu sira nian.
Artigu 25
Estadu Parte sira rekoñese direitu labarik ne’ebé autoridade kompetente aloka ba fatin ida, ho objetivu atu hetan kuidadu, protesaun ka tratamentu saúde mentál ka fíziku, atu hetan haree fali periodikamente ba tratamentu ne’ebé nia hetan ne’e no mós ba kondisaun sira seluk ne’ebé iha relasaun ho situasaun ida ne’e.
Artigu 26
1 Estadu Parte sira sei rekoñese direitu labarik nian atu hetan benefísiu husi seguransa sosiál, inklui seguru sosiál, no sei foti medida ne’ebé presiza atu bele hetan realizasaun total direitu ne’e tuir sira nia lei nasionál.
2 Benefísiu sosiál ne’e tenki, wainhira loos, hato’o hodi konsidera rekursu no situasaun labarik nian, no mos ema ne’ebé iha responsibilidade ba kuidadu labarik ida ne’e, no konsidera mós buat seluk ne’ebé relevante ba aplikasaun ba asistensia husi labarik ka
iha labarik nia naran.
Artigu 27
1 Estadu Parte sira rekoñese direitu labarik ida-idak nian ba standar moris ne’ebé natoon ba dezenvolvimentu fíziku, mentál, espirituál, morál no sosiál labarik nian.
2 Inan-aman ka ema seluk ne’ebé iha responsabilidade ba labarik, iha responsabilide uluk, tuir sira-nia abilidade no kapasidade finansiál, atu garante kondisaun moris ne’ebé nesesáriu ba dezenvolvimentu labarik nian.
3 Estadu Parte sira, tuir kondisaun nasionál no tuir sira nia kapasidade, sei hola medida sira ne’ebé diak atu tulun inan-aman no ema seluk ne’ebé iha responsibilidade ba labarik atu hala’o direitu ida ne’e no wainhira presiza sei fo tulun materiál no programa apoiu liu-liu kona-ba nutrisaun, hatais no uma.
4 Estadu Parte sira sei hola medida hotu ne’ebé diak atu hola osan ba kuidadu labarik husi inanaman ka ema seluk ne’ebé iha responsibilidade finansiál ba labarik, husi Estadu laran no mós husi rai seluk. Partikularmente, wainhira ema ne’ebé iha responsabilidade finansiál ba labarik nia moris hela iha Estadu seluk husi labarik nian, Estadu Parte sira sei buka atu hetan adesaun ba akordu internasionál ka konklui ba akordu hanesan ne’e, no mós atu halo akordu seluk ne’ebé diak.
Artigu 28
1 Estadu Parte sira rekoñese direitu labarik nian ba edukasaun, no ho objetivu ida atu hetan direitu ne’e progresivamente no bazéia ba oportunidade ne’ebé hanesan, liu-liu sira sei:
a) Hala’o edukasaun báziku hanesan obrigasaun ida no mós la selu ba ema hotu-hotu.
b) Fo beran boot ba desenvolvimentu forma oioin husi ensinu sekundáriu, inklui ensinu vokasionál no jerál, halo ensinu sira ne’e mak ensinu ne’ebé labarik ida-idak mós bele hetan no asesu, no sei hola medida sira ne’ebé diak, hanesan fó hanoin edukasaun ne’ebé la selu no oferese tulun finansiál wainhira presiza.
c) Hala’o ensinu universidade nian ne’ebé ema hotu-hotu bele hetan tuir kapasidade, ho medida hotu ne’ebé diak.
d) Halo informasaun kona-ba edukasaun no servisu, ne’ebé labarik hotu-hotu bele hetan no asesu.
e) Hola medida sira atu fó beran boot ba labarik sira atu tama eskola ho regulár no mós atu hamenus numeru labarik ne’ebé la hotu eskola.
2 Estadu Parte sira sei hola medida sira ne’ebé diak atu garante katak disiplina iha eskola hala’o ho maneira ne’ebé diak tuir dignidade labarik nian no mós tuir Konvensaun ida ne’e.
3 Estadu Parte sira sei foti no fó beran boot ba servisu hamutuk internasionál ho asuntu ne’ebé iha relasaun ho edukasaun, liu-liu ho objetivu atu tulun halakon matenek-laek no analfabetu iha mundu rai klaran no fasilita ba asesu ba matenek sientífiku no teknolojia no metodu hanorin ne’ebé modernu. Iha kazu ne’e sei fó atensaun espesiál ba nesesidade Estadu subdezenvolvidu sira nian.
Artigu 29
1 Estadu Parte sira konkorda katak labarik nia edukasaun sei hala’o ho objetivu atu:
a) Dezenvolve personalidade, talentu no kapasidade mentál no fíziku labarik nian to’o hetan potensiál ne’ebé kompletu liu.
b) Desenvolve respeitu ba direitu ema nian no liberdade fundamentál, no mós ba prinsípiu hotu ne’ebé hakerek iha Karta Nasoins Unidas nian.
c) Dezenvolve respeitu ba labarik nia inan-aman, ninia identidade kulturál, lian no valor sira ba valor nasionál husi rai iha ne’ebé labarik ne’e hela, ka husi moris-fatin labarik nian, no mós respeitu ba sivilizasaun seluk husi labarik nia sivilizasaun rasik.
d) Prepara labarik atu moris ho responsabilidade iha sosiedade ida ne’ebé livre, ho espiritu komprende malu, dame, toleránsia, igualidade sexu, no belun-malu entre povu ho grupu étniku, nasionál no relijiaun no ema rai nain hotu-hotu.
e) Dezenvolve respeitu ba ambiente natureza.
2 Laiha parte ida husi artigu ne’e ka artigu 28 ne’ebé sei interpreta katak bele interompe liberdade ema nian no organizasaun nian atu hari’i no hala’o institusaun edukasaun ne’ebé sempre tuir prinsípiu sira ne’ebé hato’o iha parágrafu 1, Artigu ida ne’e, no mos tuir nesesidade katak edukasaun ne’ebé fó iha instituisaun sira hanesan ne’e sei tuir norma
minimál hanesan determina husi Estadu.
Artigu 30
Estadu ne’ebé iha grupu minoria étniku, relijaun, ka lian, ka ema ne’ebé rai nain, labarik ne’ebé husi grupu minoria hanesan ne’e ka labarik ne’ebé rai nain, sei la lakon direitu, hamutuk ho membru seluk husi ninia grupu, atu goza ninia kultura rasik, atu kaer no hala’o ninia relijiaun rasik, ka uza ninia lian rasik.
Artigu 31
1 Estadu Parte sira rekoñese direitu labarik nian atu deskansa, halimar, no partisipa iha aktividade rekreativu ne’ebé tuir labarik nia tinan no mós atu partisipa ho livre iha moris kulturál no arte.
2 Estadu Parte sira sei respeita no promove direitu labarik nian atu partisipa totalmente iha moris kulturál no arte, no sei beran boot atu fó opportunidade ne’ebé diak no hanesan ba aktividade kultura, arte, halimar no rekreativu .
Artigu 32
1 Estadu Parte sira rekoñese direitu labarik nian atu hetan protesaun hasoru explorasaun ekonomia no hasoru servisu hotu ne’ebé perigu ka interompe ho labarik nia edukasaun, ka halo aat ba saúde, ka dezenvolvimentu fíziku, mentál, espirituál, morál ka sosiál labarik nian.
2 Estadu Parte sira sei hola medida lejislativu, administrativu, sosiál no edukasaun sira nian atu garante katak Artigu ida ne’e bele hala’o. Ba objetivu ida ne’e no hodi haree mós ba regulamentu sira ne’ebé relevante husi instrumentu internasionál sira seluk, Estadu Parte sira sei, partikularmente :
a) Determina tinan mínimu ka tinan sira be mínimu ba servisu nian;
b) Adopta regulamentu ne’ebé loos kona-ba oras servisu no kondisaun servisu nian;
c) Determina penalidade ne’ebé loos ka sansaun seluk atu garante katak artigu ne’e bele hala’o ho efektivu.
Artigu 33
Estadu Parte sira sei hola medida sira ne’ebé loos, inklui medida lejislativu sira, administrativu, sosiál no edukasaun nian atu proteje labarik sira husi uza aimoruk narkótiku no substansia psikotrópika sira ho ilegál, hanesan defíni iha akordu internasionál ne’ebé relevante, no atu prevene ema uza labarik sira hodi halo no fó sai ho ilegál substansia sira hanesan ne’e.
Artigu 34
Estadu Parte sira haka’as an atu proteje labarik sira hasoru forma esplorasaun no violénsia seksuál. Ba objetivu ida ne’e, Estadu Parte sira sei hola medida nasionál hotu-hotu, bilateral no multilateral ne’ebé loos atu prevene:
a) Lohi ka obriga labarik atu tama iha aktividade seksuál saida de’it ne’ebé ilegál;
b) Uza labarik atu esplora iha prátika prostituisaun ka prátika seksuál seluk ne’ebé ilegál.
c) Uza labarik atu esplora iha teatru no matéria ne’ebé hanesan pornografiku.
Artigu 35
Estadu Parte sira sei hola medida nasionál, bilaterál, no multilaterál hotu ne’ebé loos atu prevene ema na’ok labarik, fa’an, ka fa’an no sosa labarik tanba objetivu ka iha forma saida de’it.
Artigu 36
Estadu Parte sira sei proteje labarik hasoru forma esplorasaun hotu ne’ebé halakon aspeitu balun husi labarik nia moris diak.
Artigu 37
Estadu Parte sira sei garante katak:
a) Laiha labarik ida mak bele hetan tortura ka, hahalok ka kastigu seluk ne’ebé aat, la tuir folin ema nian ka hatun dignidade. Kastigu to’o mate no kastigu durante moris tomak ho nunka bele livre la bele fó ba ema ho tinan sanulu resin walu mai kraik ne’ebé halo hahalok sala.
b) Laiha labarik ida mak ema sei hasai ninia liberdade ho ilegál ka naran-naran deit. Kaer, fó detensaun ka dadur ba labarik ida tenke tuir lei no sei aplika hanesan hahalok ne’ebé ikus nian no ba tempu badak liu ne’ebé loos.
c) Labarik ne’ebé mak ema hasai nia liberdade sei trata tuir folin ema nian no ho respeitu ba dignidade ne’ebé iha kedas ona ba ema ida, no ho haree ba ninia presiza tuir ninia tinan. Liu-liu, labarik hotu ne’ebé ema hasai sira nian liberdade sei haketak husi ema bo’ot sira se lae karik wainhira konsidera katak halo nune’e la tuir interese diak liu labarik nian, no mos sei iha direitu atu kontaktu nafatin ho ninia família liu husi surat no vizita, lae karik wainhira iha situasaun esepsionál.
d) Labarik hotu-hotu ne’ebé mak ema hasai ninia liberdade iha direitu atu hetan lalais tulun legál no tulun seluk ne’ebé diak, no mós iha direitu atu foti lia hasoru legalidade desizaun atu hasai ninia liberdade iha tribunál ka iha autoridade seluk ne’ebé kompetente, independente no imparsiál nia oin, no mós iha direitu ba desizaun ida ne’ebé lalais kona-ba buat ne’e.
Artigu 38
1 Estadu Parte sira haka’as an atu respeita no garante respeitu ba lei humanitáriu internasionál ne’ebé aplika ba sira iha funu ho kilat ne’ebé relevante ba labarik.
2 Estadu Parte sira sei hola medida hotu ne’ebé bele atu garante katak ema ne’ebé seidauk to’o tinan sanulu resin lima la hola parte diretamente iha funu.
3 Estadu Parte sira sei tahan an atu la bele rekruta ema ne’ebé seidauk to’o tinan sanulu resin lima atu tama iha sira nia forsas armadas. Iha rekrutamentu ba ema ne’ebé to’o tinan sanulu resin lima maibé seidauk to’o tinan sanulu resin ualu, Estadu Parte sira sei haka’as an atu fó prioridade ba sira ne’ebé bo’ot liu.
4 Tuir sira nia obrigasaun tuir lei humanitáriu internasionál atu proteje ema sivíl iha funu ho kilat laran, Estadu Parte sira sei hola medida hotu ne’ebé bele atu garante protesaun no kuidadu ba labarik sira ne’ebé hetan impaktu husi funu ho kilat.
Artigu 39
Estadu Parte sira sei hola medida hotu ne’ebé diak atu foti halo diak fali fizikamente no psikolójikamente, no halo hamutuk fali iha komunidade labarik ne’ebé terus tanba forma oin-oin husi neglijénsia, esplorasaun ka abuzu; tortura ka forma seluk hahalok aat ka kastigu ne’ebé aat, la tuir folin ema nian ka hatún dignidade, ka funu ho kilat. Halo diak fali no halo hamutuk fila fali hanesan ne’e sei hala’o iha ambiente ida ne’ebé bele haburas saúde, resepeita-an no, dignidade, labarik nian.
Artigu 40
1 Estadu Parte sira rekoñese direitu labarik idaidak nian ne’ebé, hato’o katak ka akuza katak viola lei penál, atu hetan tratamentu ho dalan ne’ebé foti labarik nia laran dignidade no folin, ne’ebé hametin labarik nia respeitu ba direitu ema nian no liberdade fundamentál husi ema seluk, no mós ne’ebé konsidera labarik nia tinan, no hakarak atu foti labarik hamutuk fali ho komunidade no hala’o papél ida ne’ebé positivu iha sosiedade laran
2 Ba objetivu ida ne’e no hodi haree ba dispozisaun sira ne’ebé relevante husi instrumentu internasionál sira, Estadu Parte sira sei, liu-liu, garante katak:
a) La iha ema bele hato’o, ka akuza ka rekoñese katak labarik naran ida viola lei penál tanba ninia hahalok ka omisaun ruma ne’ebé lei nasionál ka internasionál la proiba iha tempu wainhira labarik halo hahalok ida ne’e;
b) Labarik ida-idak ne’ebé ema hato’o ka akuza katak labarik ne’e viola lei penál, sei hetan pelumenus garantia hirak hanesan tuir mai;
i) Konsidera la sala to’o wainhira prova katak sala tuir lei.
ii) Lalais no diretamente hetan informasaun kona-ba akuzasaun hasoru nia, no, se diak, hetan informasaun ida ne’e liu husi inan-aman ka ema ne’ebé hakiak legalmente, no mós atu hetan tulun legál ka tulun seluk ne’ebé loos atu prepara no hato’o ninia defeza;
iii) Ninia kazu hakotu la ho demora husi autoridade ida ne’ebé kompetente, independente no imparsial ka orgaun tribunál ida, iha prosesu tribunál ida ne’ebé justu tuir lei, ho prezensa tulun legál ka tulun seluk ne’ebé loos no mós, se lae karik wainhira konsidera katak laos ba interese diak liu labarik nian, liu-liu haree ba tinan no situasaun labarik nian, inan-aman nian
ka ema ne’ebé hakiak legalmente nian;
iv) Labele obriga atu fó sasin ka atu rekoñese salan; iha direitu atu interoga ka haruka interoga sasin sira ne’ebé kontra nia no atu hetan partisipasaun no interogasaun ba sasin iha ninia naran, tuir kondisaun igualidade nian.
v) Wainhira konsidera katak labarik viola tiha lei penál, desizaun ida ne’e no medida idaidak ne’ebé hatún tanba buat ne’e bele haree fila fali husi autoridade ida ne’ebé kompetente, independente no imparsial ka orgaun tribunál ida tuir lei.
vi) Hetan tulun ho la selu husi durubasa wainhira labarik la komprende ka la hatene koalia iha lian ne’ebé uza.
vii) Respeita labarik sira nia moris privadu iha etapa hotu-hotu prosesu judisiál nian.
3 Estadu Parte sira sira sei buka promove atu hatún lei, harii prosesu, autoridade no institusaun sira ne’ebé aplika liu-liu ba labarik, ne’ebé ema hato’o ka akuza ka rekoñese katak labarik ne’e viola tiha ona lei penál, liu-liu:
a) Determina tinan minimu ne’ebé labarik ne’ebé ki’ik liu tinan ida ne’e sei konsidera laiha kapasidade atu viola lei penál.
b) Wainhira diak no hakarak, hola medida sira atu trata labarik sira hanesan ne’e ho la presiza halo tuir prosesu lei, naran katak tenke respeita tomak direitu ema nian no hahalok protesaun legál.
4 Dispozisaun oin-oin, hanesan kuidadu, orientasaun no kontrola, konsellu, rejime prova nian, ema ne’ebé hakiak labarik, program treinu edukasaun no vokasional nian no alternativu seluk tan ba instituisaun ne’ebé mak kuidadu labarik, tenke iha atu garante katak labarik sira sei trata ho dalan ida ne’ebé diak ba sira nia moris diak no mós ne’ebé proporsionadu ba sira nia situasaun no hahalok sala ne’ebé sira halo tiha.
Artigu 41
Laiha buat ida iha Konvensaun ida ne’e nia laran, ne’ebé sei afekta provizaun hirak ne’ebé diak liu tan ba realizasaun direitu labarik nian, ne’ebé bele hetan iha:
a) Lei Estadu Parte nian, ka
b) Lei Internasionál ne’ebé aplika iha Estadu ne’e.
Parte II
Artigu 42
Estadu Parte sira sei haka’as an atu fo hatene sai prinsípiu no regulamentu sira husi Konvensaun ida ne’e atu ema hotu bele hatene liu tan, ho dalan ne’ebé loos no aktivu, no hanesan ba ema boot no labarik sira.
Artigu 43
1 Ba objetivu atu ezamina kona-ba progresu ne’ebé hala’o husi Estadu Parte sira hodi hetan realizasaun kona-ba obrigasaun ne’ebé hala’o iha Konvensaun ida ne’e, Komisaun ida kona-ba Direitu Labarik nian sei hari’i, ne’ebé sei hala’o funsaun sira hanesan hateten tuir mai.
2 Komisaun ne’e sei iha membru ema matenek nain sanulu ne’ebé ema rekoñese nu’udar iha morál diak no kompeténsia kona-ba sektór ne’ebé tama iha Konvensaun ida ne’e nia laran. Estadu Parte sira sei hili membru Komisaun nian husi ida-idak nia Estadu rasik, no membru sira ne’e sei servisu tuir kapasidade ema ida-ida nian, hodi konsiderasaun ba distribuisaun jeográfiku ne’ebé loos no mós ba sistema lei sira ne’ebé mak iha tiha ona.
3 Membru Komisaun sira sei hili liu votasaun segredu husi lista naran ema ne’ebé Estadu Parte sira hato’o nu’udar kandidatu. Estadu Parte ida-idak bele hato’o kandidatu ida husi rai laran.
4 Votasaun uluk atu hili membru Komisaun sira nian sei hala’o la kleur liu fulan neen hotu tiha loron Konvensaun ida ne’e tama ba vigor, no hafoin sei halo fali tinan rua dala ida. Mais ou menus fulan haat molok loron votasaun, Sekretariu Jerál Nasoins Unidas nian sei haruka surat ida ba Estadu Parte sira hodi husu sira atu fo naran kandidatu ne’ebé sira hili tiha ona iha fulan rua nia laran. Sekretariu Jerál hafoin sei prepara lista ida ho naran kandidatu sira hotu tuir ordem alfabétiku, hodi hatudu Estadu Parte ida ne’ebé hili ida-idak, no sei haruka lista ida ne’e fali ba Estadu Parte sira ba Konvensaun ne’e.
5 Votasaun sei hala’o iha enkontru Estadu Parte sira nian ne’ebé Sekretariu Jerál bolu atu halo, iha Sede Nasoins Unidas nian. Iha enkontru hirak ne’e prezensa tersu rua husi Estadu Parte sira hanesan ona quórum, no ema ne’ebé hili tiha ona hodi sai membru Komisaun mak sira ne’ebé hetan votasaun barak liu no maioria absolutu husi representante Estadu Parte sira ne’ebé prezente no fó sira-nia votu.
6 Membru Komisaun sira sei hili ba tempu servisu tinan haat nia laran. Sira bele hili fila fali wainhira Estadu Parte hato’o fila fali sira nia naran nu’udar kandidatu. Tempu servisu ba membru nain lima ne’ebé hili iha votasaun uluk liu sei ramata depois de tinan rua’ wainhira liu tiha votasaun uluk, xefe inkontru sei hili membru nain lima nia naran husi rifa ida.
7 Wainhira membru Komisaun ida mate ka husu sai ka hateten katak tanba buat seluk ruma tan halo nia labele ona hala’o obrigasaun Komisaun nian, Estadu Parte ida ne’ebé hato’o nia nu’udar kandidatu, sei hili fila fali matenek nain ida seluk husi rai laran hodi servisu durante tempu servisu ne’e, tuir konkordánsia husi Komisaun.
8 Komisaun sei halo rasik regra sira ne’ebé kona-ba prosesu sira nian.
9 Komisaun sei hili ninia ofisiál sira ba periode tinan rua.
10 Enkontru Komisaun nian normalmente sei hala’o iha Sede Nasoins Unidas nian ka iha fatin seluk ne’ebé determina husi Komisaun. Normalmente Komisaun sei hasoru malu tinan-tinan. Tempu ba enkontru ne’e sei determina no sei hare’e fali, wainhira presiza, liu husi enkontru ida husi Estadu Parte sira ba Konvensaun ne’e, no ne’e sei tuir konkordánsia husi Asembleia Jerál.
11 Sekretariu Jerál Nasoins Unidas nian sei fó pesoál no fasilidade ne’ebé presiza atu Komisaun bele hala’o ninia funsaun tuir Konvensaun ne’e ho efektivu.
12 Ho konkordánsia husi Asembleia Jerál, membru sira husi Komisaun ne’ebé hari’i tuir Konvensaun ne’e sei simu honorariu husi rekursu Nasoins Unidas nian tuir kondisaun no modalidade ne’ebé Asembleia bele deside.
Artigu 44
1 Estadu Parte sira haka’as an atu hatama ba Komisaun, liu husi Sekretariu Jerál Nasoins Unidas nian, relatóriu kona-ba medida hirak ne’ebé sira adopta tiha ne’ebé hala’o direitu hirak ne’ebé rekoñese iha Konvensaun ne’e nia laran no kona-ba progresu ne’ebé sira hetan tiha ona kona-ba gozu direitu sira ne’e :
a) Iha periode tinan rua nia laran depois de Konvensaun ne’e hahu aplika ho forsa ba Estadu Parte.
b) Liu tiha ne’e, tinan lima dala ida.
2 Relatóriu ne’ebé halo tuir artigu ida ne’e sei hatudu faktor no difikuldade sira, wainhira iha,
ne’ebé afekta to’o iha ne’ebé Estadu Parte bele hala’o ninia obrigasaun tuir Konvensaun ne’e. Relatóriu hanesan ne’e sei mós hato’o informasaun ne’ebé natoon atu fó konpriensaun komprensivu ba Komisaun kona-ba implementasaun Konvensaun ne’e iha Estadu ne’e nia laran.
3 Estadu Parte ida ne’ebé hato’o tiha ona relatóriu uluk ida ne’ebé komprensivu ba Komisaun la presiza repete fila fali informasaun ne’ebé hato’o tiha ona iha relatóriu tuir mai, ne’ebé sei hato’o tuir parágrafu 1 (b) husi artigu ida ne’e.
4 Komisaun bele husu informasaun seluk ne’ebé relevante ba implementasaun Konvensaun ne’e husi Estadu Parte sira.
5 Tinan rua dala ida, Komisaun sei hato’o ba Asembleia Jerál, liu husi Konselhu Ekonomia no Sosiál, relatoriu kona-ba ninia aktividade sira.
6 Estadu Parte sira sei fó asesu luan ba públiku ba sira nia relatoriu sira iha sira nia rai laran.
Artigu 45
Atu bele haburas implementasaun ne’ebé efetivu husi Konvensaun ne’e no fó beran boot ba kolaborasaun internasionál iha sektór ne’ebé tama iha Konvensaun ne’e nia laran:
a) Ajensia espesiál sira, Fundu Nasoins Unidas ba Labarik sira (unicef) no orgaun Nasoins Unidas hirak seluk sei iha direitu atu sai representante iha konsiderasaun ba implementasaun husi provizaun hirak husi Konvensaun ida ne’e ne’ebé tama iha sira nia mandatu. Komisaun bele mós konvida ajensia espesiál, Fundu Nasoins Unidas nian ba Labarik sira (unicef) no ajensia seluk wainhira konsidera diak atu fó konselho ne’ebé diak kona-ba implementasaun konvensaun ne’e iha area sira ne’ebé tama iha sira nia mandatu ida-idak. Komisaun bele konvida ajensia espesiál, Fundu Nasoins Unidas ba Labarik sira (unicef), no ajensia seluk atu hato’o relatoriu kona-ba implementasaun konvensaun nian iha area sira ne’ebé tama iha sira nia aktividade.
b) Komisaun sei haruka, wainhira konsidera diak, ba ajensia espesiál, Fundu Nasoins Unidas nian ba Labarik sira (unicef) no ajensia seluk ne’ebé kompetente, relatoriu hirak husi Estadu Parte sira ne’ebé iha pedidu ida ka hatudu nesesidade ida, ba konselhu ka tulun tekniku, no mós haruka hamutuk observasaun no sujestaun Komisaun nian, wainhira iha, kona-ba pedidu ka hatudu sira ne’e.
c) Komisaun bele rekomenda ba Asembleia Jerál atu husu ba Sekretariu Jerál atu hala’o estudu iha Komisaun nia naran, kona-ba asuntu spesífiku ne’ebé iha relasaun ho direitu labarik nian
d) Komisaun bele fó sujestaun no rekomendasaun jerál tuir informasaun ne’ebé Komisaun simu tuir artigu 44 no 45 husi Konvensaun ne’e. Sujestaun no rekomendasaun jerál sira ne’e sei haruka ba Estadu Parte idak-idak ne’ebé iha interese, no mós sei hato’o ba Asembleia Jerál, hamutuk ho komentariu ruma, wainhira iha, husi Estadu Parte sira.
Parte III
Artigu 46
Konvensaun ida ne’e sei loke atu asina husi Estadu hotu-hotu.
Artigu 47
Konvensaun ida ne’e sei hakru’uk ba ratifikasaun. Instrumentu ratifikasaun nian sei hato’o ba Sekretariu Jerál Nasoins Unidas nian.
Artigu 48
Konvensaun ida ne’e sei nakloke nafatin ba adesaun husi Estadu hotu-hotu. Instrumentu adesaun nian sei hato’o ba Sekretariu Jerál Nasoins Unidas nian.
Artigu 49
1 Konvensaun ida ne’e sei tama ba vigor iha loron tolunulu liu tiha loron ne’ebé instrumentu nain ruanulu husi ratifikasaun ka adesaun hato’o tiha ona ba Sekretariu Jerál Nasoins Unidas nian.
2 Ba Estadu ida-idak ne’ebé ratifika ka simu Konvensaun ne’e depois de instrumentu nain ruanulu ratifikasaun ka adesaun ne’e hatama tiha ona, Konvensaun ne’e sei tama ba vigor iha loron tolunulu liu tiha loron ne’ebé Estadu ne’e hato’o ona instrumentu ratifikasaun ka adesaun.
Artigu 50
1 Estadu ida-idak bele hato’o emenda ida no hatama ba Sekretariu Jerál Nasoins Unidas nian. Hafoin Sekretariu Jerál Nasoins Unidas nian sei hato’o pro- posta emenda ida ne’e ba Estadu Parte sira ho husu ida katak sira fó hatene se sira hakarak atu halo konferénsia ida husi Estadu Parte sira hodi tetu no vota kona-ba proposta sira ne’e. Se akontese katak, iha fulan haat nia laran liu tiha hato’o komunikasaun hanesan ne’e, pelumenus tersu ida (1/3) husi Estadu Parte sira hakarak duni atu halo konferensia ida hanesan ne’e, mak Sekretariu Jerál sei halao konferensia ida ne’e iha organizasaun Nasoins Unidas nian okos. Emenda ruma ne’ebé adopta husi maioria husi Estadu Parte sira ne’ebé halo parte iha konferensia, no mós votasaun husi konferensia sei hato’o ba Asembelia Jerál atu aprova.
2 Emenda ida ne’ebé adopta tuir paragrafu 1 husi artigu ida ne’e sei tama ba vigor wainhira hetan aprovasaun husi Asembleia Jerál Nasoins Unidas nian no simu husi maioria tersu rua (2/3) husi Estadu Parte sira.
3 Wainhira emenda ida tama ba vigor, Estadu Parte sira ne’ebé simu tiha ona emenda ida ne’e tenke ser tuir emenda ne’e, Estadu Parte sira seluk mak sei tuir nafatin ho provizaun sira husi Konvensaun hanesan agora dau-daun ne’e no amenda foun ruma ne’ebé mak sira simu tiha ona.
Artigu 51
1 Sekretariu Jerál Nasoins Unidas nian sei simu no haruka ba Estadu hotu-hotu testu reservasaun nian ne’ebé Estadu sira halo iha periodu ratifikasaun ka adesaun.
2 Reservasaun ida ne’ebé la tuir objetivu no intensaun husi Konvensaun ida ne’e sei la bele simu.
3 Reservasaun bele dada sai iha tempu ruma hodi notifikasaun kona-ba buat ne’e,ba Sekretariu Jerál Nasoins Unidas nian, ne’ebé hafoin sei fó hatene buat ne’e ba Estadu hotu-hotu. Notifikasaun hanesan ne’e sei hahu aplika iha loron ne’ebé Sekretari Jerál simu.
Artigu 52
Estadu Parte ida bele dada-an husi Konvensaun ne’e hodi notifikasaun ho hakerek ba Sekretariu Jerál Nasoins Unidas nian. Hahalok dada-an sei hahu aplika iha tinan ida liu tiha loron ne’ebé Sekretariu Jerál simu notifikasaun ida ne’e.
Artigu 53
Sekretariu Jerál Nasoins Unidas nian mak hili hanesan ema ne’ebé mak rai Konvensaun ne’e.
Artigu 54
Testu orijinal husi Konvensaun ida ne’e, ne’ebé ho lian Árabe, Xina, Inglés, Fransés, Russo, no Español mós nu’udar testu auténtiku ne’ebé hanesan, sei hatama ba Sekretariu Jerál Nasoins Unidas nian.
Hodi sasin husi plenipotensiáriu sira ne’ebé asina iha okos, no mós ho autorizaun atu halo nune’e husi governu ida-idak nian, mak asina tiha ona Konvensaun ida ne’e.

Aucun commentaire: